Katër aeroplanë me pajisje mjekësore u nisën të shtunën nga Aeroporti i Beogradit për në Itali – një nga vendet më të prekura nga COVID-19.
Carlo Lo Cascio, Ambasador i Italisë në Beograd e falenderoi Serbinë për ndihmën, teksa theksoi se ky është një “gjest i madh”.
“Kjo është një ndihmë shumë e rëndësishme për ne. Ky material do të jetë shumë i dobishëm për spitalet tona, për të shpëtuar jetë njerëzish nga koronavirusi”, tha Lo Cascio.
Presidenti i Serbisë, Aleksandar Vuçiç tha se ndihma për Italinë përbëhet nga 2 milion maska kirurgjikale, 2 milion maska epidemiologjike, 1 milion doreza mbrojtëse dhe pajisje tjera.
“Serbia do t’i dërgojë Italisë tetë aeroplanë me ndihma. Katër sot, dy nesër dhe dy pasnesër. Këto janë mallra që Serbia i ka blerë me paratë e qytetarëve të saj. Italia ka tani më shumë nevojë se ne. Vendi ynë është i furnizuar”, tha Vuçiç, shkruan “Rel”.
Në kutitë me pajisje mbrojtëse kundër koronavirusit është shkruar: “Ne do të fitojmë së bashku – Itali ji e fortë, Serbia është me ju”.
