Kryeministri Edi Rama ka prezantuar sot planin financiar në lidhje me situatën e krijuar në vend nga përhapja e koronavirusit.
Në komunikimin e tij live me qytetarët, Rama theksoi se janë dy plane ekonomike (A dhe Një plan rezervë B), në varësi sesi do të shkojë situata në ditët në vijim.
Kreu i qeverisë tregoi se sa do të jenë fondet për Ministrinë e Shëndetësisë, kompanitë apo Ministrinë e Mbrojtjes.
Gjithashtu ai shtoi se deri në përfundimin e kësaj situate, do t’i përgjysmohet paga deputetëve, ministrave.
Pjesë nga fjala e Ramës:
Unë në fakt doja që qysh në planin e parë të imponoja heqjen e diçkaje nga vetja, për ata që fitojnë më shumë në sektorin privat, apo ata me pagë të lartë por më bindën që do tingëllonte e gabuar. Ndaj nuk do prekim hë për hë asnjë pagë përveç anëtarëve të kabinetit dhe deputetëve, të cilët do marrin gjysmën e rrogës. Nuk dua t’i hyj në hak presidentit të Republikës që ka ndihmuar në këtë situatë.
Plani ynë për adresimin e nevojave për financim të atyre që janë prekur ka këto 7 pika:
- 25 mln dollarë për luftën në vijën e zjarrit që vihet në dispozicion të MSH.
- 100 mln dollarë për kompanitë që kanë vështirësi objektive për të paguar pagat e punonjësve të tyre.
- 65 mln dollarë për nevojat më imediate për shtresat në nevojë, për biznesin e vogël.
- 20 mln dollarë në dispozicion të ministrisë së Mbrojtjes për operacionin humanitar.
- 10 mln dollarë si fond rezervë për Këshillin e Ministrave për çdo urgjencë.
- Do të fshijmë kamatëvonesat për energjinë elektrike me efekt financiar, deri në 150 mln dollarë. Do përfitojnë 224 mijë abonentë.
- Do të skedulojmë tatim fitimin për gjithë biznesin.
