Kryeministri Edi Rama ka ritheksuar se masat e marra nga qeveria, për frenimin e përhapjes së koronavirusit ishin të nevojshme.
Në një lidhje të drejtpërdrejtë me emisionin “Open” në Top Channel, Rama tha se ndodhemi në luftë me një sëmundje kalimtare. Kreu i qeverisë tha se edhe liderët e Francës dhe SHBA-ve e kanë pranuar se kjo është një luftë me armikun e padukshëm.
Sipas tij, e vetmja mënyrë për ta përballuar këtë armik është me anë të këtyre masave shtrënguese.
“Kur unë thashë që jemi në luftë, shumë thanë që kjo nuk është luftë, por një sëmundje kalimtare. Sot presidenti i Francës flet për luftë, Merkel flet për luftë, presidenti i Shteteve të Bashkuara të Amerikës flet për luftë. Jemi në luftë dhe vetëm masat shtrënguese janë e vetmja rrugë për t’u përballur me këtë armik”, tha Rama.
Kujtojmë se deri më tani në Shqipëri janë kryer më shumë se 600 teste për koronavirus, teksa 59 prej tyre kanë rezultuar pozitive.
