Përhapja e shpejtë e koronavirusit në Greqi ka bërë që të shtohet frika edhe për shtrirjen e këtij virusi nëpër burgje.
Në lidhje me këtë, Ministria greke e Drejtësisë ka nisur implementimin e një plani të posaçëm. Sipas mediave vendase, të gjitha lejet për të burgosurit janë anuluar, ndërsa janë pezulluar edhe transferimet e tyre.
Gjithashtu bëhet me dije se janë shtuar rojet dhe masat e sigurisë brenda dhe në perimetrin e institucioneve të riedukimit.
Po ashtu janë dezinfektuar të gjitha ambientet e burgjeve dhe janë marrë masa për pastrimin dhe dezinfektimin e të gjitha ambienteve, të paktën një herë në javë.
Ndërkohë janë ndaluar edhe ushqimet dhe veshjet nga jashtë institucioneve. Raportohet se ministria ka dhënë një urdhër të posaçëm që të gjithë të dënuarve t’iu matet temperatura dhe të kontrollohen për simptoma çdo ditë.
Në 28 burgjet greke mbahen më shumë se 10,400 të dënuar, mes tyre rreth 2,600 shqiptarë.
