Koronavirusi mbetet një kërcënim për të gjithë botën. Deri më tani janë infektuar në të gjithë globin 156.798 dhe kanë humbur jetën 5.839 të tjerë. Në Itali, 1266 persona kanë vdekur nga koronavirusi, e po kështu miliona njerëz janë në karantinë. E njëjta situatë nuk paraqitet në Korenë e Jugut. Ndonëse është goditur në të njëjtën kohë, kanë humbur jetën 72 persona.
Italia fillimisht ka bërë testime masive, pastaj i ka ngushtuar ato, duke mos qenë në gjendje të kontrollojë qindra-mijëra pacientë, dhe në fund ka vendosur të kufizojë lëvizjen e njerëzve. Ndërsa në Korenë e Jugut, autoritetet i janë përgjigjur ndryshe epidemisë me përmasa të ngjashme.
Atje janë testuar qindra-mijëra njerëz, dhe i kanë gjurmuar transmetuesit e mundshëm të virusit si detektivë, duke përdorur telefonat mobilë dhe teknologjinë satelitore. Në të dyja vendet, të infektuarit e parë janë regjistruar në fund të janarit. Që atëherë, në Korenë e Jugut kanë vdekur 72 njerëz nga gati 8.000 raste të prekura, ndërsa janë testuar mbi 222.000 banorë. Në Itali kanë vdekur 1.266, janë infektuar mbi 17.660, ndërsa janë testuar rreth 73.000. Këto të dhëna tregojnë se testimi agresiv dhe i vazhdueshëm është mjet i fuqishëm në luftën kundër koronavirusit.
