Drejtori për Emergjenca në OBSH, Mike Ryan ka paralajmëruar se pandemia e koronavirusit mund të mos zhduket kurrë.
Gjatë një konference për mediat, Ryan tha se edhe nëse gjendet vaksina, kontrollimi i virusit do të kërkojë “përpjekje masive”.
Nga ana tjetër Kombet e Bashkuara ngrenë shqetësimin se situata e krijuar nga koronavirusi, po shkakton probleme të mëdha të shëndetit mendor. Sidomos në vendet ku ka mungesë të investimeve në kujdes të shëndetit mendor.
Sipas OKB-së, qeveritë duhet ta përfshijnë këtë fushë si pjesë të përgjigjes së tyre të përgjithshme kundër kësaj krize.
Më shumë se 4,4 milionë njerëz nga e gjithë bota janë prekur nga COVID-19, ndërsa rreth 300 mijë persona kanë humbur jetën.
Deri më tani janë shëruar 1,661,505 raste infektimi në të gjithë botën, ndërsa numri i rasteve aktive është 2,470,478. Sipas Worldometer, mbi 45 mijë të infektuar në të gjithë botën ndodhen në gjendje të rëndë shëndetësore.
