Në Maqedoninë e Veriut është rritur numri i viktimave si pasojë e COVID-19.
Ministria e Shëndetësisë e Maqedonisë së Veriut ka njoftuar të mërkurën për dy viktima të tjera.
Kësisoj numri i të vdekurve ka arritur në 88.
Viktimat janë nga Prilepi dhe Manastiri, dy të moshuar që kishin edhe probleme të tjera shëndetësore.
Sipas raportit të Ministrisë, gjatë 24 orëve të fundit, janë regjistruar 13 raste të reja me koronavirus, që paraqet rritje në krahasim me tre ditët e fundit, kur numri i të infektuarve ishte nën dhjetë persona.
Numri i personave që ende janë aktivë me sëmundjen COVID-19, që shkakton ky virus është 394 ndërsa i personave të shëruar ka arritur në 1,057. Që nga paraqitja e pandemisë, me koronavirus janë evidentuar 1,539 ndërsa numri i testeve të kryera është 17,836.
Drejtuesit e institucioneve kanë njoftuar se nga java tjetër do të nisin me masat lehtësuese të lëvizjes dhe për rifillimin e punës së disa prej bizneseve, por në përputhje me kushtet e përcaktuara nga komisioni i sëmundjeve ngjitëse, shkruan “Rel”.
