Kryeministri i Kosovës Albin Kurti përgjatë një konference në ambient të hapur i bëri thirrje qytetarëve që të respektojnë masat për t’u mbrojtur nga COVID-19.
Ai theksoi se qytetarët duhet të ndërgjegjësohen dhe të mësojnë nga fatkeqësitë që ka shkaktuar COVID-19 në vendet e tjera të botës.
Kurti gjatë fjalës së tij, hezitoi që të jepte koment mbi mocionin e mosbesimit të LDK-së, por foli vetëm për koronavirusin dhe masat që janë ndërmarrë nga qeveria.
“Konferencave në ambient të mbyllur u erdhi fundi, por së shpejti edhe konferencave në ambient të hapur do u japim fund, dhe do të komunikojmë virtualisht. Kjo është një krizë me të cilën nuk është se jemi përballur ndonjëherë.
Ta frenojmë përhapjen e virusit COVID-19 dhe ta mbajmë të plotë sistemin tonë shëndetësor.
Jemi para shifrave të mëdha të koronavirusit në Evropë. Në Kosovë jemi vetëm në fazën e parë. Duhet të ndërgjegjësohemi.
Secili prej nesh duhet të kujdeset për veten dhe për të tjerët. Mbrëmë kemi mbyllur parqet. Disiplinë indviduale, higjienë personale…rri pastër, rri në distancë, rri në shtëpi.
Më e mira në këtë rrezik pademik për njeriun është që të qëndrojmë vetëm. Le të mësojmë nga fatkeqësia në vendet e tjera që mos ta përsërisim këtu tek ne. Vendime do të merren ditë pas dite.
Do ta njohim të vërtetën mbi shfaqjen e COVID-19 vetëm dy javët e ardhshme”, deklaroi Kurti.
