Një spital lundrues do të vijë në shërbim të pacientëve të infektuar me koronavirus. Guvernatori i Nju Jorkut e ka përcjellë këtë lajm për gazetarët, ndërsa konfirmoi se i ka të gjitha kapacitetet për të përballuar këtë pandemi.
Marina amerikane do të dërgojë një anije spitalore me 1.000 shtretër, në portin e Nju Jorkut. “Eshtë një hap i jashtëzakonshëm, padyshim, bëhet fjalë për një spital lundrues që do të shtojë kapacitetet”, tha Guvernatori i Nju Jorkut, Andrew Cuomo.
Guvernatori Cuomo tha se ai dhe presidenti Trump po “luftojnë të njëjtën luftë”, dhe janë në të njëjtën llogore.
Guvernatori zbuloi se ai foli me presidentin Donald Trump, i cili do të autorizojë anijen spitalore për t’u vendosur në Nju Jork. Përveç 1.000 shtretërve, anija është e pajisur edhe me salla operacioni.
Kjo masë e menjëhershme është ndërmarrë, pasi shteti nuk i ka mundësitë për të ndërtuar një spital në kohë rekord, sikundër e bëri Kina.
Guvernatori Cuomo dhe kryetari i Bashkisë së Nju Jorkut, Bill de Blasio kanë ditë që thonë se sistemi spitalor i Nju Jorkut mund të mbingarkohet. Kjo pasi numri i rasteve të personave të infektuar po shtohet nga ora në orë. “Ne nuk mund të ndërtojmë spitale të reja brenda 45 ditësh,” tha Cuomo. “Qeveria federale mund të jetë jashtëzakonisht e dobishme. Dhe ne kemi nevojë për ndihmën e qeverisë federale”.
