Nëse mendoni se masat e marra në Shqipëri për frenimin e koronavirusit janë të rrepta, atëherë nuk jeni ende në dijeni për masat e marra nga Franca.
Siç raportojnë mediat vendase, qytetarëve francezë po u kërkohet të plotësojnë një formular, ku të justifikojnë arsyet se pse duan të dalin jashtë banesës së tyre.
Qoftë edhe për një shëtitje të shkurtër apo pazar, ata duhet të plotësojnë medoemos formularin për të dalë nga shtëpia e tyre.
Raportohet se rreth 100 mijë policë po patrullojnë rrugët e Francës për t’u siguruar që kjo masë të zbatohet. Nëse personat e shkelin këtë urdhër, atëherë ata rrezikojnë të marrin gjoba që shkojnë deri në 135 euro.
Masat e njoftuara nga pallati Elize përfshijnë edhe kufizimin e udhëtimeve mes Francës dhe vendeve të Bashkimit Evropian brenda të paktën 30 ditëve.
Deri para dy ditësh Franca ishte në “moskokëçarje” komplete sa i përket marrjes së masave ndaj koronavirusit, teksa njerëzit mbushnin sheshet, dyqanet dhe parqet.
Por numri i madh i të infektuarve ka bërë që shteti të reagojë, duke kërkuar izolimin e plotë të qytetarëve.
“Ishte shokuese t’i shihje njerëzit të grumbulluar nëpër parqe gjatë fundjavës. Këtu nuk po ndiqen këshillat që vijnë nga nivelet më të larta të qeverisë, dhe nuk po zbatohet kërkesa për distancim social”, deklaroi Hervé Berville, ligjvënës dhe aleat i presidentit Emmanuel Macron.
Koronavirusi ka shënuar deri më tani 148 viktima në Francë, ndërsa më shumë se 6,600 persona janë infektuar.
