Teksa situata nga koronavirusi në vendet e tjera të Evropës si Itali, Spanjë dhe Francë duket të jetë përmirësuar, ky nuk është rasti për Mbretërinë e Bashkuar.
Kjo e fundit vijon të regjistrojë numrin më të madh të viktimave nga COVID-19, brenda një dite në kontinent.
Në 24 orët e fundit, në Mbretërinë e Bashkuar janë shënuar 338 viktima, duke e çuar në 36,042 numrin total të personave që kanë humbur jetën nga ky virus.
Gjithashtu ky është numri i dytë më i lartë në botë i viktimave nga koronavirusi në një vend, pas SHBA-ve që regjistrojnë mbi 95 mijë viktima.
Gjatë 24 orëve të fundit në MB janë shënuar edhe 2,615 raste të reja me koronavirus. Kështu shkon në 250,908 numri total i personave të infektuar, numri i pestë më i lartë në botë, pas SHBA-ve, Rusisë, Brazilit dhe Spanjës.
Më shumë se 5 milionë njerëz nga e gjithë bota janë prekur nga COVID-19, ndërsa mbi 330 mijë persona kanë humbur jetën.
