Ministri i Shtetit për Rindërtimin, Arben Ahmetaj ka folur në lidhje me rënien ekonomike që vjen si pasojë e mbylljes së bizneseve dhe kufijve për shkak të përhapjes së koronavirusit në vend.
Në një intervistë për emisionin “5 Pyetjet”, Ahmetaj tha se rënia ekonomike është e pashmangshme. Ai deklaroi se gjatë muajit mars kjo rënie llogaritet prej 60-70 milionë lekësh.
Ahmetaj tha se nëse kjo situatë vazhdon edhe për 3 muajt e ardhshëm, atëherë kjo rënie mund të shkojë deri në 40 miliardë lekë.
“Bizneset që kanë punë jetike janë lejuar të punojnë duke respektuar masat e sigurisë. Ne kemi variantin A për përgjysmim të rritjes ekonomike dhe vetëm për muajin mars llogaritet një rënie prej 60-70 milionë lekë. Nëse virusi tregohen më drastik dhe përhapet më shumë, atëherë për 3 muaj mund të kemi humbje prej 40 miliardë lekë. Kjo situatë është si një trup i plagosur rëndë me plagë të hapura që rrjedhin gjak pafund dhe humbin pulsin ngadalë”, tha ai.
