Në Itali situata vijon të jetë e njëjtë, me asnjë shenjë përmirësimi nga pandemia. Spitalet janë të tejmbushura, e ndërsa autoritetet ende nuk kanë parë asnjë rezultat pavarësisht masave të marra. Italia është një ndër vendet më të goditura nga koronavirusi, ku ndryshe është quajtur edhe si epiqendra e Covid-19 në Europë.
Kryeministri Giuseppe Conte duhet të paraqitet sot në Parlament, me masat e reja shtesë. Nga ajo çfarë citojnë mediat në vendin fqinj, po flitet për një kufizim më të madh të personave mbi 70 vjeç, duke i ndaluar për qarkullimin.
Më shumë se në pranverë, tani kërkohet bashkëpunim nga ana e komunitetit. Rajonet gjithashtu kërkojnë të mos bëhen dallime mes tyre, ndaj një tjetër skenar është izolimi total prej orës 21:00 të mbrëmjes. Duke mos dashur mbylljen totale, mund të bihet dakord edhe me mbylljen e bareve dhe restoranteve prej orëve të mesditës dhe me vonë, të të gjitha aktiviteteve tregtare përveç farmacive.
Këto masa pritet të aplikohen fillimisht në zonat e Lombardisë, Piemontes e Ligurias. “Duhet të shtrëngojmë masat, ose do përballemi me vështirësi të reja”, tha ministri i shëndetësisë, Roberto Speranza.
