Koreja e Veriut ka miratuar një ligj të ri gjithëpërfshirës i cili kërkon të zhdukë çdo lloj ndikimi të huaj. Vendi komunist do të ndëshkojë ashpër këdo që kapet duke parë filma të huaj, veshur xhinse apo edhe duke përdorur zhargon.
Yoon Mi-so në një rrëfim për BBC, tha se ajo ishte vetëm 11 vjeç kur pa për herë të parë një burrë të ekzekutohej, pasi u kap me një film dramatik koreano-jugor. Të gjithë u detyruan të shikonin ekzekutimin.
“Nëse nuk e bënim do të quhej si tradhti. Unë akoma e kam parasyve momentin kur lotët e tij rridhnin edhe pse sytë i kishte të lidhura me fasho. Ai moment ka qenë traumatik për mua. Ata e vunë në një kunj dhe e lidhën, pastaj e qëlluan”, tha Mi-so.
Kushdo që kapet me filma nga Koreja e Jugut, Shtetet e Bashkuara ose Japonia tani përballet me dënimin me vdekje. Gjithashtu prerjet e flokëve dhe veshjet po ashtu janë rreptësisht të kontrolluara për të shmangur ndikimin e huaj, të përshkruar si “një helm i rrezikshëm” për popullatën.
