Kryeministri Edi Rama mbrëmjen e së shtunës e mbylli në qytetin e Korçës, ku prezantoi kandidatin për zgjedhjet vendore, e ku tha me plot bindje se data e zgjedhjeve nuk do të shtyhet.
Në fjalën e mbajtur, kreu i qeverisë rikujtoi marrëveshjen politike me Lulzim Bashën në 17 maj 2017, teksa nënvizoi se ishte Basha ai që i kërkoi të futet në zgjedhje. Rama shtoi se në vitin 2017 ai u bë Romeo i asaj kohe duke iu lutur Zhulietës (Lulzim Bashës).
“Pse të rrezikojmë një përplasje, le t’i shtyjmë zgjedhjet. Pyetjen se çfarë problemi ka t’i shtyjmë zgjedhjet ja kam bërë edhe unë vetes. Dhe po të nisem nga interesi i ngushtë, jam i pari të them që s’ka problem, qeverinë e kam. Shumicën në parlament po, në nivelin e qeverisjes vendore kemi qeverisjen e 75 % të territorit, në bashkitë kryesore të vendit kemi pothuajse të gjitha bashkitë kryesore që drejtojmë. Kur në parlament duhej votuar vettingu, ikën. Isha unë Romeo i asaj kohe që ju luta Xhuljetës siç nuk do kisha pasur dot fuqi t’i lutesha gjithë vajzave të bukura të Korçës në gjithë jetën time dhe në fund fare e binda Xhulin, hajde kërko çfarë të duash. Mori gjysmën e qeverisë, gjysmën më me peshë. Më tha çfarë do ti? Unë i thash të votoni vettingun, kush fiton qeveris dhe nuk shahet më në gjuhë të huaj Shqipëria. Kaq ishin kërkesat e mia”, deklaroi Rama.
