Nga Anxhela Ferra
I krijuar në 1966, kopshti zoologjik është i vetmi në Tiranë, por më shumë se një kopsht ngjason me një park, pasi kafshët të cilat ndodhen këtu janë të pakta.
Rijetëzimi i Kopshtit Botanik dhe Zoologjik ka qenë një prej pikave më të forta të kryebashkiakut Erion Veliaj, në vitin 2015, kur kandidoi për Bashkinë e Tiranës. Ai premtoi se këtë hapësirë do ta kthente nga një kopsht të trishtë, në një kopsht me standarde evropiane. Sipas Veliajt, numri i kafshëve do të rritet dhe ato nuk do të mbyllen më në kafaze, por do të qëndrojnë në mjedise të hapura të ngjashme me habitatin e tyre natyror.
Edhe pse jemi pranë përfundimit të mandatit, në kopshtin zoologjik gjendja vazhdon të mbetet e njëjtë. Madje sipas vizitorëve kafshët sa vijnë edhe pakësohen.
“Çfarë ta vizitosh këtë, vetëm dy kafshë janë. Nuk ke çfarë t’i tregosh fëmijëve. Është copë-copë, gjendje skandaloze gjynah. Kaq kafshë i sheh edhe nëpër Tiranë.
Fëmijët duan të shohin kafshë të ndryshme, që ndoshta edhe nuk i njohin. Çfarë ka këtu?! Dy ujqër, një ari, edhe ato ishin duke ngordhur. Më shumë traumatizohen fëmijët kur i shohin kështu në këtë gjendje.
Kështu ka qenë ky kopshti gjithmonë, skandaloz. Këtu ka nevojë t’i vihet kazma të gjithë vendit, që të bëhet nga fillimi.”
“Kafshët shumë të lodhura, krahasuar me gjithë kopshtet e tjera jashtë shtetit. Përveç ariut që i duket interesante fëmijëve, nuk ka larmishmëri. Kafazi brenda nuk kishte fare kafshë, vetëm tre ishin. Gjithë ky park i madh është gjynah që nuk ka më shumë kafshë.”
Fëmijët shprehen për Tirana Today se do të donin të kishte më shumë kafshë. Si edhe të kishte emërtime për kafshët, se çfarë janë, pasi ndonjëherë është e vështirë t’i identifikosh.
Sipas administratorëve të kopshtit zoologjik, ende nuk ka një datë të përcaktuar nga Bashkia e Tiranës, se kur do të fillojnë punimet për rijetëzimin e kësaj hapësire. TIRANA TODAY
