Kreu i grupit parlamentar të PS-së, Taulant Balla iu drejtua sot në Kuvend kreut të demokratëve, Lulzim Basha për të dhënë shpjegime lidhur me 1 milionë USD të cilat sipas tij janë përdorur për të sponsorizuar artikuj që nxijnë Shqipërinë.
Pas deklaratës së bërë nga deputeti Taulant Balla se PS ditën e hënë do të bëjë kallëzim penal për Bashën, lidhur me atë që e ka quajtur skandalin e financimit, ka reaguar prerë kryedemokrati Basha.
Balla: Ti Lulzim Basha duhet tu thuash shqiptarëve se ku i ke gjetur 1 milionë dollar për të paguar artikuj që nxijnë Shqipërinë. Burime të konfirmuara bëjnë me dije se këto para i përkasin një fondi të zi aferash korruptive të administruara nga një person i lidhur me Bashën. Ky fond është regjistruar në një ishull offshore për të fshehur lidhjet me Bashën. Ky po i shmanget pyetjeve direkte për përdorimin e parave. Sot është dita të dalësh këtu dhe të sqarosh ku i ke gjetur 1 milionë USD për të nxirë Shqipërinë, përmes kujt i ke çuar këto para në një ishull offshore për ti ikur radarëve të ligjit? Ne do paraqesim të hënën kallëzim penal për Bashën si i akuzuar për këtë skemë mashtrimi financiar me vulën e Partisë Demokratike.
Basha: Edi Rama nga gjithë njerëzit për të bërë furtunën e radhës në gotë që ti ikësh pyetjeve që nuk u jep dot përgjigje për Tahirin, Habilajt, Balilajt, vëllanë e Ministrit të Brendshëm, për llogaritë ofshore që të ka akuzuar OSBE, për 200 milionë euro, i vure gishtin këtij, nuk e di, apo nuk do ta dish se ky ka rënë në rrjetën e hetimit për pastrimin e parave prej vitesh dhe nuk e mbron më as imuniteti, as fjalimet e stisura. Mjafton të kishe pyetur drejtorin tënd të policisë se çfarë ka bërë ky para një muaji me një nga të akuzuarit nga Prokuroria e Elbasanit në Rumani. Por, kjo është vetëm maja e ajsbergut.
Balla: Konsistoj në atë që është çështja mbi të cilën duhet që të merret ky Parlament sot. Thirrjes që ta hetojë FBI apo institucione të tjera, nëse nuk ka filluar shumë shpejt do të fillojë. Ti po përpiqesh që të imitosh Berishën, dhe imitoje sa të duash. Ne të dy dallojmë shumë, të dy kemi hyrë në parlament në vitin 2005. Milionat e rrugës së Kombit, vrasja e 4 shqiptarëve, shtija e tokës së shqiptarë, nuk bëre asnjë gisht punë në Tiranë, të gjitha këto akuza rëndojnë mbi ty.
