Në Ditën Ndërkombëtare kundër Dhunës, ministrja e Shëndetësisë Ogerta Manastirliu ka hapur fushatën e 16 ditëve të aktivizimit kundër dhunës me bazë gjinore.
Mbi 4 mijë raste të dhunës në familje janë evidentuar dhe trajtuar nga strukturat e Policisë së Shtetit në 10 muajt e parë të këtij viti, tha ministrja.
“Në Shqipëri 1 në 2 gra kanë përjetuar një nga format e dhunës dhe 18% prej tyre kanë pësuar dhunë seksuale. 17 viktima të dhunës në familje vetëm gjatë këtij viti, 12 nga të cilët, vajza, gra, nëna e bashkëshorte që kanë humbur jetën si pasojë e dhunës në familje. Nuk ka më kohë për të humbur për të humbur, duhet që e gjithë shoqëria të reagojë kundër këtij fenomeni”, deklaroi Manastirliu.
Ndër të tjera, ajo tha se janë marrë një sërë masash në luftën kundër dhunës në familje. Ndërsa paralajmëroi edhe forcimin e masave për dhunuesit, me paketën e re të qeverisë.
“Janë bërë hapa përpara në drejtim të plotësimit të legjislacionit. Me forcimin e ligjit ‘Për masa ndaj dhunës në marrëdhëniet familjare’ sigurohet mbrojtje më e madhe për viktimat e dhunës në marrëdhënie familjare ose afektive, me udherin paraprak të mbrojtjes se menjehershme. Paralelisht, është ngritur Mekanizmi i Koordinuar i Referimit të rasteve të dhunës në familje në 40 bashki dhe është në proces në bashkitë e tjera”, theksoi Manastirliu.
