Vrasësit me pagesë duket se i kanë marrë jetën ish-policit Xhelal Reçi. Këto janë dyshimet paraprake të policisë, marrë shkas nga dëshmia e dhënë e djalit të tij Besnik Reçi, dhe faktit se makina që u përdor për atentatin rezulton të jetë vjedhur në Fier.
Ish-polici Xhelal Reçi u qëllua me armë zjarri nga një makinë në lëvizje, pranë një banke të nivelit të dytë në qytetin e Laçit. 60-vjeçari nuk u mbijetoi dot plagëve, duke mbetur i vdekur në vend. Sipas burimeve, kanë qenë persona nga qyteti i Fierit, të cilët janë paguar dhe kanë udhëtuar drejt Laçit ku ekzekutuan 60-vjeçarin.
Pista kryesore është ajo e vrasjes për shkak të llogarive dhe konflikteve me grupe kriminale, të djalit të viktimës Besnik Reçi, të cilit në gusht të vitit të kaluar iu bë atentat por shpëtoi pasi u largua me shpejtësi.
Besniku, i shpëtoi atentatit të mirëorganizuar. Ai ishte duke udhëtuar në rrugën Lezhë-Shëngjin bashkë me dy fëmijët e mitur dhe bashkëshorten, kur dy persona të armatosur me motor, e ndoqën dhe tentuan ta qëllonin me plumba. Autorët qëlluan drejt makinës së Reçit, por fatmirësisht plumbat nuk kapën as të dhe as familjen.
