Policia e Shkodrës ka arrestuar në flagrancë një 38-vjeçar, ku pas një konflikti për motive të dobëta, dyshohet se ka qëlluar me armë zjarri në drejtim të shtatasit K. Rr., i cili ka qenë duke punuar në autolavazhin e tij. Uniformat blu kanë vënë në pranga shtetasin me inicialet L.L., 38 vjeç, banues në fshatin Shtoj i Vjetër, Shkodër.
“Qëllon me armë në drejtim të një shtetasi, kapet autori në kohë rekord nga policia e Shkodrës. Nga strukturat e policisë së Shkodrës, falë reagimit të shpejtë, u arrestua në flagrancë shtetasi L.L., 38 vjeç, banues në fshatin Shtoj i Vjetër, Shkodër.
Mesditën e sotme, shtetasi L. L., pas një konflikti për motive të dobëta, në lagjen Skënderbeg, dyshohet se ka qëlluar me armë zjarri në drejtim të shtatasit K. Rr., i cili ka qenë duke punuar në autolavazhin e tij.
Personi i arrestuar dyshohet se armën që ka përdorur e ka hedhur në lumin Buna, gjatë ndjekjes nga policia, ku vijon puna për gjetjen e saj.
Në bashkëpunim me Prokurorinë vijojnë hetimet për zbardhjen e plotë të kësaj ngjarjeje. Materialet iu referuan Prokurorisë së Rrethit Gjyqësor Shkodër për veprat penale “Vrasja me dashje, mbetur në tentative” dhe “Prodhimi dhe mbajtja pa leje e armëve luftarake dhe e municionit”.
