Mbretëria e Bashkuar është një nga 5 vendet që shënon numrin më të madh të viktimave nga koronavirusi.
Deri më tani janë shënuar 4,313 viktima, ndërsa janë regjistruar më shumë se 41 mijë raste infektimi.
Si duket COVID-19 nuk i ka kursyer as figurat politike, pasi pas lajmit për infektimin e kryeministrit Johnson dhe princit Charles, vjen edhe lajmi se një këngëtare e njohur britanike ka rezultuar pozitive.
Këngëtarja britanike Marianne Faithfull, ikonë e viteve 60-të, është shtruar në spital pasi ka rezultuar pozitive me koronavirus.
Lajmi u bë i ditur nga menaxheri i saj, i cili tha se ajo po kurohet për koronavirusin në një spital në Londër. Raportohet se ajo ndodhet në kushte të stabilizuara dhe po i përgjigjet mirë trajtimeve që po merr.
Artistja amerikane Penny Arkade, mikeshë e këngëtares britanike 73-vjeçare, ka shkruar në adresën e saj në Facebook që Marianne ishte shtruar në spital të martën, për shkak të një kolle që i kishte filluar teksa ishte në karantinë.
Marianne Faithfull ka qenë një ikonë e viteve 60, ku vetëm 17 vjeç u ngjit në skenë falë këngës “As Tears Go By” e shkruar nga Mick Jagger dhe Keith Richards e Rolling Stones.
