Në dy javët e fundit është reflektuar shtim i rasteve të reja me Covid. Marrë shkas nga situata, është mbledhur Komiteti Teknik i Ekspertëve. Përpos Tiranës, përhapja e rasteve të reja përkonte në zonat bregdetare, më së shumti në Vlorë për t’u ndjekur nga Shkodra e Durrësi.
Drejtoresha e ISHP-së Eugena Tomini, tha se ka pasur një trend në rritje të rasteve pozitive në dy javët e fundit, ndërsa ka bërë thirrje për ndërgjegjësim dhe marrje të dozës së tretë dhe të katërt për t’u mbrojtur nga virusi.
“Prej dy javësh ka një trend në rritje të rasteve të konfirmuara pozitive. Ky trend po pasqyrohet me rritjen e përqindjes së pozitivitetit, dhe të shtrimit të pacientëve. Ka pësuar rritje nga gati 4-5 muajt pararendëse. Për sa i përket bashkive, në 90% kemi raste aktive dhe aktualisht popullata shqiptare duhet të vaksinohet me dozë të 3 dhe të 4. COVID ka treguar se nuk ka një sezonalitet dhe është i pranishëm gjatë të gjithë muajve të vitit”.
Po kështu edhe Shefja e Departamentit të Epidemiologjisë në Institutin e Shëndetit Publik, Silva Bino, i ka bërë thirrje qytetarëve që të marrin dozat e vaksinës.
“Dua të them që vaksinimi është një mjet i rëndësishëm për të parandaluar vdekjet dhe shtrimet në spital, është i rëndësishëm në këtë periudhë që jemi. Përqindja e vaksinimit me dozë të parë ka pësuar rënie, vaksinimi me dozë të tretë ka shënuar një rritje të lehtë.
Por përqindja ditore dhe javore e vaksinimit, mbetet e ulët në krahasim me muajt e parë. Mbi 12 vjec është 51.3% me një dozë, ndërsa vaksinimi me dy doza është 48.7%. Me dozën e tretë 13.1% dhe me dozën e katërt 0.2 %.
Përqindja e vaksinimit në popullatën adulte është 60.8% me një dozë, 57% me dy doza. Për popullatën adulte kemi një mbulesë vaksinale 57%. Edhe këtu vaksinimi mbetet 12.4%. Për të gjithë popullatën është 40.9%, ndërsa me dy doza është 46%. Ndërsa vaksinimi me dozën e tretë 10%.
Nëse do të shkojmë në popullatën sipas grupmoshave, ata që kanë më shumë janë ata mbi 70 vjeç. Mbi 60 vjec kjo mbulesë vaksinale është 68% dhe me tre doza mbetet 35%.
Nën 50 vjeç, mbulesa vaksinale shkon në 52% me dy doza, ndërsa me një dozë 12%. Grupmoshat nën 30 vjeç mbulesa vaksinale është nën 30%”, tha Bino.
