Komisioni Hetimor Parlamentar është mbledhur mesditën e sotme për të shqyrtuar kërkesën e deputetëve socialistë, për çështjen e presidentit Meta.
Në këtë mbledhje, kreu i komisionit, Ulsi Manja u shpreh se hetimi i plotë mbi vendimin e Metës do të bëhet brenda 3 muajsh dhe më pas do t’i dorëzohet Kuvendit.
“Qëllimi i ngritjes së tij është i njohur, unë po shfrytëzoj rastin dhe po lexoj vendimin e kuvendit të Shqipërisë: Ky komision hetimor ka për qëllim të hetojë njohjen dhe ushtrimin e kompetencave nga ana e presidentit të Republikës lidhur me organizimin e zgjedhjeve vendore dhe nxjerrjen e përgjegjësive konkrete. Ky komision ka për detyrë të verifikojë procedurat e ndjekura nga presidenti i Republikës, të verifikojë pasoja e këtyre akteve në raport me institucionet e tjera.
Në optikën e kolegëve deputetë që kanë kërkuar shkarkimin e tij konstatohet se sjellja e tij në lidhje me procedurat e ndjekura, presidenti ka shkelur rëndë kushtetutën dhe kjo sipas tyre përbën shkak ligjor për pezullimin nga detyra. Ky komision referuar saktësisht vendimit 84, për një periudhë 3 mujore do bëjë një hetim të plotë për t’i paraqitur Kuvendit një raport përfundimtar. Ky është edhe deklarimi i komisionit hetimor i përcaktuar në vendimin dhe komisioni është i detyruar t’i rrijë strikt”, deklaroi Manja.
Në mbledhjen e zhvilluar u vendos që, Halit Valteri dhe socialisti Alket Hyseni të jenë bashkërelatorët, që do të duhet të përgatisin rregulloren e punës dhe planin paraprak të hetimit.
Kujtojmë që, ky komision do të vendosë për shkarkimin ose jo të Kreut të Shtetit, Ilir Meta, pas vendimit të tij për të anuluar 30 qershorin si datë të zgjedhjeve vendore.
Denonco ne TT