Komanda Qendrore e SHBA-ve njofton se Shqipëria do të bëhet shteti i shtatë, që do të patrullojë ujërat e Lindjes së Mesme.
Komando falenderon Shqipërinë që do t’i bashkohet SHBA-ve, Anglisë dhe Arabisë Saudite, në këtë koalicion. Ky i fundit siguron kalimin e tankerëve të naftës dhe anijeve të tjera të transportit në ujërat e Lindjes së Mesme.
“Shqipëria iu bashkohet Shteteve të Bashkuara, Mbretërisë së Bashkuar, Australisë, Mbretërisë së Arabisë Saudite, Emirateve të Bashkuara Arabe dhe Bahreinit për të kontribuar në IMSC.
Liria e lundrimit është një normë ndërkombëtare jetike për mbrojtjen e së cilës komuniteti ndërkombëtar duhet të punojë së bashku”, njofton Komanda e SHBA-ve. Ndërkohë, ende nuk është qartësuar nëse Shqipëria do të marrë pjesë në këtë koalicion me anijet e vogla patrulluese, apo vetëm me marinarë.
Gjatë muajve të fundit, tankerët e naftës dhe anijet e tjera tregtare janë ndjerë të kërcënuara nga sulmet në Gjirin e Hormuzit, ku disa prej tyre u sulmuan dhe morën flakë. SHBA-të akuzuan ushtrinë iraniane për këto sulme, por këta të fundit mohuan çdo pjesëmarrje, duke fajësuar vendet e tjera të Gjirit Persik.
