Zbardhen detaje të reja nga operacioni ndërkombëtar “ATOS”, të zhvilluar në katër shtete të ndryshme, ku u sekuestruan 232 kg kokainë dhe u arrestuan 6 shtetas shqiptarë, 1 grek dhe 1 lituanez.
Hetimet për këtë rrjet droge nisën prej vitit 2018 kur policia gjermane kapi 1 ton kokainë dhe arrestoi 10 shqiptarë.
Mësohet se mes shqiptarëve të arrestuar, janë dhe dy nipërit e deputetit të Partisë Socialiste, Rrahman Rraja, Ramazan Rraja dhe Fioralb Rraja.
Të dy janë drejtues të një grupi të strukturuar kriminal, që merret me trafik kokaine nga Amerika Latine në drejtim të Belgjikës, Holandës e Gjermanisë. Lënda narkotike dyshohet se fshihej në kontenierë, në trup të tyre ose në arkat me banane.
Ramazan Rraja u përfshi në një skandal me ish-të dashurën e tij, Xhisiela Maloku rreth 10 muaj më parë. Ai u bë i njohur për publikun edhe gjatë një skene dhune në ambjente e QSUT, ku dhunoi në sy të qytetarëve dhe të një punonjëseje policie një vajzë.
Një tjetër personazh i njohur është edhe Musa Gjikola, i cili më 3 janar 2015 u prangos në Angli dhe iu sekuestruan 300.000 stërlina, fryt i aktiviteteve të kundra ligjshme.
