Deputeti i Partisë Demokratike, Ervin Salianji, e ka cilësuar si një vendimmarrje të fortë përjashtimin e ish-kryeministrit Sali Berisha nga grupi parlamentar demokrat. Teksa ishte i ftuar në një studio televizive, Salianji zbuloi se përjashtimi i Berishës, sipas tij, i jep një mundësi Partisë Demokratike që të vijë në pushtet.
Ndër të tjera, ai ka thumbuar aktivisten shqiptaro-amerikane, Evi Kokalari. “Këtu flitet si për një presion, në deklaratën e zonjës Kokalari. Qytetarët që marrin fjalën në këto takime janë të profileve të ndryshme. Personazhet që për nga përmbajtja duken boshe dhe kanë shfaqje skizofrenike. Nuk është ironi, por përshkrim që mendoj se është më realist i personazheve të këtij lloj që Shqipëria ka personazhe të shumta. Besoni që me një të prekur mund të shëroheni nga tumori? Në kodrën përballë në Tiranë, ka pasur shenjtorë të tillë, Leonora quhej”, u shpreh Salianji.
Por ky qëndrim nuk i ka shpëtuar znj. Kokalari. Përmes një postimi në rrjetet sociale Kokalari nuk e ka kursyer Salianjin, teksa i ka thënë se nëse do rrinte me burra si Berisha dhe jo me Grida Dumën, do kishte arritur ta njihte.
“O Salianj më raftë pika sa i voçkël je. Po të kishe ndenjur me burrat si Sali Berisha dhe jo mbas fustanit të Gridës, do e kishe mësuar kush është Evo Kokalari. Pi pak qumësht tashti”, shkruan ajo.
