Arber Çekaj, personi i dyshuar për trafikimin e 613 kilogramëve kokaine kolumbiane në portin e Durrësit, pas ekstradimit në Rinas është transportuar për në burgun “313” në Tiranë.
Transferimi i Çekajt nga Rinasi në ambientet e burgut është kryer nën masa të rrepta sigurie. “BalkanWeb” ka siguruar videon e mbërritjes së tij në burgun 313.
Lajmi i ekstradimit u bë i ditur nga zv.drejtoresha e Përgjithshme Aida Hajnaj, përmes një deklarate për mediat.
Arbër Çekaj u arrestuar në Gjermani dhe pas arrestimit ai kërkoi që të mos ekstradohej, me argumentin se në Shqipëri i rrezikohet jeta. Ai është pronari i kompanisë “Arbri Garden” në kontenierët me banane të së cilës në fund të shkurtit të 2018 u kapën edhe 613 kg kokainë që vinin nga Kolumbia.
