Opozita inauguron kodin e etikës parlamentare duke i flakëruar mbi kokë një qese me mielli Kryeministrit Rama i cili nuk kishte shumë që kishte zënë karrigen e tij në parlament.
Pas miellit opozita ka harxhuar të gjithë arsenalin e “armëve” në dispozicion si letra, shishe plastike, dhe një vezë që është pritur nga badigardët pak para se të përfundonte në kokën e Ramës.
Kundër opozitës ka ngritur dorën vetëm ministri Bushati i cili ka derdhur gjysmën e bidonit të tij me ujë drejt deputetëve të djathtë pavarësisht këshillave të shefit të tij për qetësi.
Pasi kanë dështuar duke bërë portierin gardistët janë detyruar të hapin çadrën kuq e zi para Ramës e Bushatit që ishin zbardhur tashmë nga mielli.
Situata u ndez fill pasi kryeopozitari Basha bëri rezistencë që të përjashtohej kryeministri Rama nga Kuvendi. Në krah të tij dolën edhe deputetët e opozitës. Ku të gjithë para foltores nisën të godasin tavolinat e të bllokojnë vijimin normal të seancës.
Situata nuk u qetësua edhe pas ndërhyrjes së kreut të parlamentit që largoi gardën nga pozicioni mbrojtës.
Sendet e hedhura janë shoqëruar me një fjalor të larmishëm nga të dyja palët si “rrugaç” “trap”, “hajdut” kriminel” “bandit” si për të kremtuar kodin e etikës në sjellje të hyrë prej pak kohësh në fuqi.
Pas aktit të opozitës u përjashtuan tre deputetë të PD-së, Ervin Salianji, Flamur Noka dhe Klevis Balliu. “Nxirrini jashtë” ishte thirrja e kryeparlamentarit Ruçi.
Ky nuk është rasti i parë që deputetët qëllojnë njëri tjetrin me ç’ti vij në dorë dhe jo vetëm.
Kujtojmë këtu se në parlamentin e Shqipërisë janë parë shumë akte të ngjashme në kohë të ndryshme, që nga goditjet me rrip, me karrige, me vezë, me biodona, me vazo lulesh, letra, me çizme, tymuese e deri tek atentati i parë me armë i deputetit të ndjerë Azem Hajdari.
E veçanta e ditës së sotme ishte pasurimi I arsenalit opozitar me qese mielli.
Ndërsa pyetja shtrohet, po nesër kush e ka radhën?
