Partia Bindja Demokratike e cilëson qesharake koalicionin e firmosur nga PS dhe partitë e tjera që kanë pranuar të futen bashkë në zgjedhjet e 30 qershorit.
Përmes një postimi në “Facebook”, Bindja shkruan se kjo është me qesharake se koalicioni opozitar.
Ndërkohë, në reagim thuhet se Taulant Balla, si personi i cili shpalli koalicionin me partitë e vogla, duhet të mësojë se zgjedhjet janë një çështje shumë serioze, me të cilën nuk mund të tallesh dhe se nuk mund të ketë rreth 21 parti, që i bashkohen ‘Rilindjes’.
REAGIMI I PLOTË:
KOALICIONI QESHARAK I “RILINDJES” ME RRETH 21 PARTI
Ky koalicioni i “Rilindjes” me njëzet e ca parti më të vogla për të garuar bashkë në zgjedhjet e 30 qershorit është disa herë me qesharak se koalicioni i disa partive në opozitë, që i kanë dhënë fjalën njëra tjetrës për të mos hyrë në zgjedhje.
Ne nuk duam që t’i japim kaq rëndësi vetes, por e gjitha kjo ngjan sikur në këto zgjedhje të dy palët kanë kundërshtar apo armik, sipas rastit, vetëm BINDJEN DEMOKRATIKE.
Ky Taulanti i Ramës që doli ta shpallte këtë fitore të “Rilindjes” duhet të mësojë dy gjëra:
E para, që zgjedhjet janë një çështje shumë serioze, me të cilën nuk mund të tallesh. Sepse duhet të kesh një minimum respekti për njerëzit që do të votojnë, qoftë edhe për ata që kanë vendosur të mos shkojnë në zgjedhje.
E dyta, ai duhet të mësojë se nuk mund të ketë rreth 21 parti, që i bashkohen “Rilindjes”, sepse kjo shprehje nuk përdoret, kur e di numrin e saktë, por vetëm atëherë kur nuk je i sigurtë se sa janë. Ne e dimë se ai nuk ka ndonjë konsideratë për shumë nga ato partitë që kanë vetëm kryetarin, por të mos e bëjë kaq baltë sikur edhe me numrin e tyre ka qejf të bëjë gallatë.
