LSI do të marrë pjesë në zgjedhjet e pjesshme në koalicion me Grupin e Rithemelimit. Kjo u konfirmua sot nga ish-kryeministri Sali Berisha, teksa prezantoi kandidatët për 6 Bashkitë.
Në reagimin e parë, LSI deklaron se do të jenë “të gjithë bashkë për rivendosjen e integritetit të votës së lirë”.
“I tmerruar nga primaret e djeshme të jashtëzakonshme, deputeti Basha i cili mashtroi për 10 vite e si bëri kurrë tani provokon LSI-në për të shmangur vëmendjen nga kandidatët që caktohen me zarfa në minutë të fundit prej 10 vitesh. Të gjithë për rivendosjen e integritetit të votës së lirë”, thotë LSI.
Ish-kryeministri Sali Berisha konfirmoi se në zgjedhjet e pjesshme vendore të 6 marsit, kandidatët e dalë nga primaret do të garojnë në një koalicion me LSI-në, të pagëzuar me sloganin “Shtëpia e Lirisë”.
Vetë kandidatët fitues e cilësuan shpresëdhënëse për të ardhmen e demokracisë në parti garën e primareve, duke u angazhuar për fitoren në 6 mars.
