Pasditen e sotme, skaneri në portin e Durrësit ka zbuluar një sasi të madhe kokaine prej 200 kg, që ishte fshehur brenda strukturës së çeliktë të konteinerit. Konteineri rezulton i ngarkuar me banane, por brenda në kolonat e çelikut ishte vendosur sasia e kokainës.
Konteineri i përket kompanisë së eksportit të frutave e quajtur “Masabi Fruits”, një kompani e themeluar në 20 mars 2018 dhe që administrohet nga dy ortakët Erion Peti dhe Klajdi Xibraku.
Ngarkesa është nisur 24 ditë më parë, teksa operacioni ka nisur shumë shpejt, aq sa prokurorët e SPAK nuk kanë shkuar ende në vendin e ngjarjes.
Prokuroria ka në përgjim disa persona dhe pronarë kompanish të cilët mund të jenë të përfshirë në trafikun e kokainës nga Amerika Latine në Shqipëri.
Pak ditë më parë, më 1 prill, në Portin e Durrësit u sekuestrua një tjetër sasi kokainë prej 49 kg.
Ajo vinte nga Amerika Latine në një konteiner me banane në pronësi të Selim Çekaj, babai i Arbën Çekaj, ky i fundit i dënuar me 14 vite burg për sasinë 613 kg kokainë në 2018. Të dy ndodhen aktualisht në burg.
