Kryeministri i Kosovës, Avdullah Hoti, pas mbledhjes së Komitetit për Pandeminë ka paralajmëruar për kthimin e karantinimit. Duke iu referuar gjendjes alarmante me të prekurit, Hoti tha ndër të tjera se policia është sinjalizuar dhe se do të marrë të gjitha autorizimit e nevojshme.
“Jemi duke diskutuar për karantinimin ku ka më së shumti raste. Duhet të rregullojmë pak më mirë ceremonitë mortore. Policia do të merr të gjitha autorizimet e nevojshme. Të gjitha resurset i kemi vënë në funksion”, ka thënë Hoti.
Ndër të tjera, kryeministri Hoti ka theksuar se nuk mund të lejohet që gjendja të dalë jashtë kontrollit. Duke bërë një bilanc të situatës, ai tha se Klinika Infektive i ka kaluar kapacitetet.
“Kemi 49 raste me fatalitet, Klinika Infektive është e stërmbushur, nuk ka më vende për njerëz. Janë duke u krijuar vende në klinika tjera. Masat janë të thjeshta, maskat, distanca dhe larja e duarve. Jemi të obliguar t’iu përmbahemi”, ka theksuar Hoti.
Kryeministri ka paralajmëruar veprime penale për personat që nuk iu përmbahen masave. “Situata është nën kontroll të brishtë, dhe duhet të punojmë të gjithë për ta menaxhuar. Diskutuam për masat që do të marrim, duke filluar nga reduktimi i punësimit në institucione. Do të mbyllim të gjithë sektorët në departamentet ku ka raste. Duhet të kontrollohen, që personat e infektuar të mbesin të izoluar. Duhet të aktivizohen shtabet lokale nëpër komuna. Inspektorati sanitar do të marr masat ndëshkimore në rrugë, biznese e kudo. Inspektorët do të jenë 24 orë dhe nëse nuk mbani maskë do të dënoheni”, ka thënë kryeministri Hoti.
