Ish-deputetja e LSI-së, Klajda Gjosha ka reaguar sa i përket situatës së tensionuar politike të krijuar në vend, pas anulimit të datës së zgjedhjeve nga presidenti dhe kërcënimeve të kryeministrit Rama, për shkarkimin e Metës.
Nëpërmjet një postimi në Facebook, ish-deputetja shprehet se situata e krijuar në Shqipëri është e paprecedentë dhe që në këto momente të afrimit të negociatave me BE-në, kur fjala kyç duhet të jetë dialogu, shteti po përçahet më shumë.
“Në vend që dialogu të ishte kryefjalë e këtij momenti kyç për Shqipërinë evropiane, fatkeqësisht duket sikur politika është zhytur në një marrëzi anti-institucionale dhe anti-ligjore! Shqiptarëve çdo ditë e më shumë po i mungon qeverisja, përkujdesja, siguria, liria dhe respekti ndaj të drejtave themelore si qytetarë të këtij vendi. Sot vendi është përçarë në parcela politike, ku Kryeministri flet me ‘Ne dhe Ata’, ku është absurde të mendosh se luftën e bën me shqiptarët e thjeshtë, ndërkohë që lufta e vërtetë duhet të ishte me varfërinë, krimin, korrupsionin e padrejtësinë”, shkruhet në postimin e Klajda Gjosha.
Ajo e krahason situatën në vend me një diktaturë, ku sipas saj përfaqësuesit e institucioneve të pavarura marrin urdhra partiakë, ku parlamenti prodhon rezoluta që njollosin vendin dhe organizohen zgjedhje imagjinare, në shkelje të Kushtetutës.
“Përfaqësuesit e institucioneve të pavarura marrin urdhra partiakë, si të ishim në një diktaturë të egër të shumë viteve më parë. Parlamenti funksionon në legjitimitet dhe paturpësisht prodhon rezoluta të sforcuara që po njollosin vendin. Ndërkohë që marrëzia vazhdon më tej me organizimin e zgjedhjeve imagjinare, në shkelje të Kushtetutës, duke injoruar zërin e shqiptarëve që janë ende në kërkim të votës së lirë”, u shpreh ish-deputetja e LSI-së.
Postimi i Gjoshës:
Një shtet që nuk njeh ligjin dhe Kushtetutën quhet Diktaturë!
Kjo që po ndodh në Shqipëri, është jo vetëm e paprecedentë, por duket se ne po shkojmë drejt një shteti të marrë peng nga një grup individësh që kërkojnë me çdo kusht rrënimin e demokracisë dhe të të drejtave të njeriut!
Në vend që dialogu të ishte kryefjalë e këtij momenti kyç për Shqipërinë europiane, fatkeqësisht duket sikur politika është zhytyr në një marrëzi anti institucionale dhe anti ligjore!
Shqiptarëve cdo ditë e më shumë po i mungon qeverisja, përkujdesja, siguria, liria dhe respekti ndaj të drejtave themelore si qytetarë të këtij vendi.
Sot vendi është përcarë në parcela politike ku Kryeministri flet me ‘Ne dhe Ata’, ku është absurde të mendosh se luftën e bën me shqiptarët e thjeshtë, ndërkohë që lufta e vërtetë duhet të ishte me varfërinë, krimin, korrupsionin e padrejtësinë!
Përfaqësuesit e institucioneve të pavarura marrin urdhëra partiakë, si të ishim në një diktaturë të egër të shumë viteve më parë. Parlamenti funksionon në ilegjitimitet dhe paturpësisht prodhon rezoluta të sforcuara që po njollosin vendin. Ndërkohë që marrëzia vazhdon më tej me organizimin e zgjedhjeve imagjinare, në shkelje të Kushtetutës, duke injoruar zërin e shqiptarëve që janë ende në kërkim të votës së lirë! Dhe për të mos u ndalur këtu, cmëndina politike vazhdon më tej me vendime të Këshillit të Ministrave për të ndryshur hartën territoriale të Bashkive që është një çështje ligjore në thelbin e saj dhe jo vendim që merret qorrazi nga një kabinet qeveritar!
Jam e keqardhur që shteti ka dalë nga shinat e kornizës ligjore dhe kushtetuese. Sepse një shtet që nuk njeh ligjin dhe Kushtetutën quhet Diktaturë!
