Presidenti Ilir Meta nuk iu ndahet kërcënimeve. Ai tha se interesi i tij nuk është opozita, por shqiptarët, që po e braktisin masivisht vendin. I ftuar në ‘Çim Peka LIVE’, Meta rikujtoi kohën kur opozita dogji mandatet dhe këshillën që iu ka dhënë deputetëve. Sipas tij, akti i tyre nuk shërbeu për asgjë, pasi për të, Rama është i papërgjegjshëm dhe nuk ka reflektuar.
“Nuk më intereson opozita, më interesojnë shqiptarët. Unë i kam thënë opozitës, që të mos djegin mandatet se Rama është i papërgjegjshëm dhe nuk do reflektojë. Kjo është çështje për jetë a vdekje. O ka Shqipëri me shqiptarë, o banori më i ri në Shqipëri mbetet Ilir Meta”, tha ai.
Ai kërcënoi se kush prek zgjedhjet, do të përballet me probleme të mëdha. “Kam thënë se kush prek zgjedhjet, do ketë probleme të paimagjinueshme. Duan të bëhen kurban për pushtetin e Ramës? Le të bëhen. Në rast se Rama respekton 5 Qershorin, Ilir Meta do të vazhdojë punën e tij”, u shpreh më tej ai.
Kreu i shtetit sfidoi Ramën për debat, duke thënë se ai shpif te ndërkombëtarët. “Mashtron ndërkombëtarët duke i thënë se Ylli Ndroqi, pas sekuestrimit të pasurisë e bëri telefonatën e parë me Ilir Metën. Ai që bën këto fabrikime, siç ka bërë të gjitha në Shqipëri, që e ka lënë vendin pa Gjykatë Kushtetuese. Shikoni se çfarë tha Komisioni i Venecias për këtë”.
I pyetur se çfarë do të bëjë në rast të problemeve në zgjedhje, ai tha: “Të siguroj që presidenti do bëjë të gjitha aktet që bën një president patriot”.
