Ish-kryeministri Sali Berisha është përgjigjur sot nga Elbasani akuzave për largimin e tij dhe të Lulzim Bashës. Zgjedhjet e 6 marsit në gjashtë njësi vendore, prodhuan një rezultat të dobët për PD-në zyrtare, e cila doli forcë e tretë. Kjo solli reagimin e mbështetësve të Bashës në Grupin Parlamentar që i kërkuan të japë dorëheqje. Berisha është pyetur nëse do sakrifikohej për ideal të PD-së, ku tha se ka një përpjekje për të stisur një përballje mes votës së lirë dhe blofit. Kujtojmë këtu se një pjesë e anëtarëve të Grupit të Partisë Demokratike kanë kërkuar dorëheqjen e kreut të partisë, Lulzim Basha, pas dështimit në zgjedhjet e pjesshme të 6 marsit në gjashtë bashki.
“Është një rast për të uruar sot qytetarët e Elbasanit dhe mbarë Shqipërisë Gëzuar Ditën e Verës, Hirushen e festave tona kombëtare siç do ta quante Faik Konica. Uroj qytetarët e Elbasanit në veçanti, të cilët kanë meritën e madhe se mbajtën gjallë më shumë se të tjerët këtë festë të mrekullueshme dhe sot Elbasani me të drejtë konsiderohet nga çdo shqiptar, kryeqyteti i festës.
Festa e Ditës së Verës është festë e shndërrimeve të mëdha, e lulëzimit, e shpërthimit të burimeve, e çeljes së gjithçkaje të mirë. Në këtë kontekst, uroj që për shqiptarët kjo ditë të sjellë ndërrimin e madh që ata presin me padurim, ndërrimin e narkoshtetit dhe rivendosjen e shtetit ligjor.
Një urim të përzemërt kam për ata qindra mijëra qytetarë shqiptarë, që kanë mbushur gjatë këtyre ditëve rrugët dhe sheshet e qyteteve të vendit për të protestuar kundër një politike cinike, të pashpirt, e cila përdor si skuzë, si pretekst hijet e luftës në Ukrainë për të justifikuar rritjen dramatike, absolutisht të pajustifikuar të çmimeve të produkteve më jetike të qytetarëve shqiptarë. Tani dhe njëherë gëzuar këtë ditë për mbarë qytetarët e Elbasanit dhe mbarë shqiptarët!”.
A do jetë pranvera e ribashkimit të PD?
“Kjo do jetë pranverë e përpjekjeve të mëdha të demokracisë për ngadhënjimin e saj. Absolutisht, mesazhi më i shkëlqyer është bashkimi i demokratëve rreth votës së lirë dhe idealeve të tyre të lirisë”.
Ka nga ata që kërkojnë largimin e Berishës, të paktën ata që kanë qenë pranë Bashës. A do sakrifikoheshit për idealin e PD?
“S’po mbroj asgjë tjetër përveç votës së lirë. E vërteta është që ka një përpjekje për të stisur një përballje mes votës së lirë dhe blofit, por atyre që e bëjnë këtë do t’u lëmë blofin në dorë”.
