Presidenti francez Emmanuel Macron refuzoi një test rus për Covid, përpara takimit të tij me Vladimir Putinin e Rusisë, ka konfirmuar Kremlini. Testi kërkonte një protokoll shëndetësor që ishte i papranueshëm, dhe nuk përputhej me orarin e liderit francez, tha një burim francez për BBC.
Kjo pason raportet se Macron refuzoi testin PCR, nga frika se rusët do të merrnin ADN-në e tij. Udhëheqësit mbajtën më pas një takim në distancë.
Ata nuk shtrënguan duart dhe u ulën me një tavolinë katër metra të gjatë mes tyre, me vëzhguesit që pyesnin nëse zoti Putin po e përdorte atë për të dërguar një mesazh diplomatik.
Por burimet diplomatike franceze i thanë “Reuters”, se Macronit i ishte thënë të zgjidhte midis pranimit të një testi rus PCR për t’iu afruar Putinit, ose respektimit të rregullave strikte të distancimit shoqëror.
“Ne e dinim shumë mirë që kjo do të thoshte mos shtrëngim duarsh dhe atë tryezë të gjatë. Por nuk mund të pranonim që ata të kapnin ADN-në e presidentit,” tha një nga burimet për “Reuters”.
Burimi nuk elaboroi se si shërbimet e inteligjencës ruse mund të shfrytëzonin ADN-në e Macron. Një burim në Pallatin Elysée tha për “BBC”: “Kushtet e vendosura që takimi të zhvillohej pa distancim social kërkonin një protokoll shëndetësor, i cili sipas nesh ishte i papranueshëm dhe i papajtueshëm me orarin e presidentit”.
Kremlini konfirmoi se Macron ishte mbajtur në distancë nga udhëheqësi rus, sepse ai kishte refuzuar të bënte një test rus.
Zëdhënësi i Kremlinit, Dmitry Peskov, tha se Rusia e kupton qëndrimin francez dhe se kjo nuk ka ndikuar tek bisedimet. Macron kishte kryer një test PCR përpara se të largohej nga Franca, dhe mjeku i tij kreu një test antigeni pasi ata ishin në Moskë, tha një burim tjetër diplomatik francez për “Reuters”.
Tre ditë pas takimit me Macron, Putin priti presidentin kazak Kassym-Jomart Tokayev. Ata shtrënguan duart, dhe u ulën me një tavolinë të vogël.
Vendet perëndimore thonë se Rusia mund të pushtojë Ukrainën, por Rusia mohon të planifikojë ta bëjë këtë, pavarësisht se ka grumbulluar 100.000 trupa në kufirin e Ukrainës.
Departamenti Amerikan i Shtetit u ka kërkuar amerikanëve në Ukrainë, që të largohen menjëherë.
Burimi i lajmit: BBC. Përshtatur nga Tirana Today
