Pesë shqiptarë dhe një rumun janë vënë në pranga, pasi posedonin një sasi të konsiderueshme lënde narkotike, të cilën e kishin fshehur në kutitë me banane. Bëhet fjalë për plot 500 kilogramë kokainë, me vlerë 20 milionë euro, sekuestruar në fundjavë në qytetin Ulm në Gjermani.
Mediat gjermane raportojnë se droga ishte fshehur në kuti me banane. Një punonjës i kompanisë “Fruchthof Nagel” ka zbuluar kokainën, teksa po kryente një kontroll të rastësishëm për të analizuar cilësinë e mallit të porositur.
Të njëjtat burime shtojnë se për të vënë në pranga pronarët e vërtetë të drogës, lajmi është mbajtur i fshehtë të premten dhe kokaina është lënë brenda pakove me banane.
Gjatë mbrëmjes së të shtunës, disa persona u përpoqën të futeshin në magazinën e kompanisë, por u arrestuan në flagrancë nga forcat speciale të policisë shtetërore të landit të Bavarisë. 6 të arrestuarit janë të moshës 24 deri në 39 vjeç. Pesë prej tyre janë shtetas shqiptarë, ndërsa njëri rumun.
Mediat gjermane raportojnë se nga hetimet paraprake dyshohet se të gjashtë kanë udhëtuar në Gjermani nga shtetet e tyre, enkas për të marrë sasinë e lëndës narkotike. Ata do të largoheshin përsëri, pasi ta kishin marrë atë. Të gjashtë të arrestuarit, emrat e të cilëve nuk janë bërë publik për shkaqe hetimi, dolën para gjykatës të hënën dhe morën masën e sigurisë, duke u lënë në burg.
