Luca Zaia, i cili është guvernator i Venetos, ka kërkuar falje publike pasi në një intervistë televizive akuzoi kinezët si “popull i pistë” dhe shtoi se kishte parë video ku ata hanin minj të gjallë.
Ai ka thënë se është masakruar me kritika të shumta, pasi tha diçka që është keqkuptuar. Për të gjithë ata të cilët janë ndjerë të ofenduar, ai ka kërkuar falje.
“Jam masakruar për një frazë që doli keq. Nëse dikush është ndjerë i ofenduar, kërkoj falje”, tha guvernatori. Reagimi i tij vjen pasi Ambasada e Kinës në Itali, e kritikoi ashpër atë për “frazat ofenduese”.
“Nuk ishte qëllimi im që të përgjithësoja. Doja të vija në dukje lajmet e rreme dhe videot që qarkullonin, përpara se virusi të vinte në Itali”, tha më tej ai.
Në lidhje me higjienën dhe zakonet e kinezëve, Zaia saktësoi: “Doja të thoja se siguria ushqimore dhe sanitare ndryshon nga njëri vend në tjetrin. Ishte një reflektim për një vend që ka metropole moderne dhe zona të tjera që janë komplet e kundërta”.
