Kina vuri në funksion hidrocentralin Baihetan, i cili cilësohet si i dyti më i madh në botë, për nga kapaciteti. Ky hidrocentral, është ndërtuar mbi lumin Jinsha për të tentuar objektivin madhor të autonomisë energjetike.
Kina është optimiste që vënia në funksion i hidrocentraleve do të kufizojë të paktën përdorimin e qymyrit, një nga shkaqet kryesore të ndotjes mjedisore në vendin aziatik.
Vënia në funksion i këtij hidrocentrali do të kursejë përdorimin e rreth 20 milionë tonelata qymyr, ndërkohë që kapaciteti i hidrocentralit do të jetë 16 milionë kilovatë, i ndarë në 16 gjeneratorë.
Edhe hidrocentrali më i madh në botë ndodhet në Kinë, jo shumë larg nga Baihetani. Bëhet fjalë për hidrocentralin e Tre Grykave, në lumin Yangtze, me kapacitet 22 milionë kilovatë.
Për ndërtimin e këtij të fundit, gjithsesi, rreth 1.3 milion persona u detyruan të shpërnguleshin dhe disa qyteza u përmbytën, si dhe shumë site arkeologjike.
