Sipas një raporti të ri të Pentagonit, Kina do të dyfishojë në dekadën e ardhshme arsenalin e saj të raketave me mbushje bërthamore. Gjithashtu Kina po vazhdon përpjekjet për rritjen e kapaciteteve për të kryer sulme bërthamore nga toka, deti dhe ajri.
Mes të tjerash, raporti i përvitshëm i Pentagonit, i quajtur “Fuqia Ushtarake e Kinës”, i cili u publikua të martën, theksoi se modernizimi dhe zgjerimi i fuqisë bërthamore të Kinës është pjesë e një përpjekjeje më të gjerë që synon të barazohet, dhe në disa raste të tejkalojë, ushtrinë e Shteteve të Bashkuara deri në vitin 2049 si fuqia dominuese në rajonin e Indo-Paqësorit.
Numri i mbushjeve bërthamore aktualisht vlerësohet të jetë pak më shumë se 200 dhe përfshin ato që mund të instalohen në raketa balistike, të afta për të arritur në Shtetet e Bashkuara.
