Pas një ‘lumë’ akuzash të ardhura nga SHBA, duket se Kina është ‘dorëzuar’, ndërsa ka pranuar që të nisin hetimet. Duket se shigjetimet e shpeshta të ardhura nga presidenti Donald Trump, nuk kanë shkuar në ‘vesh të shurdhër’.
Kina ka njoftuar se do të mbështesë Organizatën Botërore të Shëndetit, në përpjekjet për të zbuluar origjinën e pandemisë. Por pas kësaj qëndron edhe një kërkesë, ku çdo hetim duhet të jetë shkencor, dhe jo në një kontekst politik.
Shtetet e Bashkuara e kanë akuzuar Kinën, se nuk është treguar transparente në lidhje me origjinën e virusit, dhe se dështoi të ndalojë shpërthimin e tij. Nga ana tjetër, Pekini ka hedhur poshtë çdo pretendim të tillë. Kohët e fundit, autoritetet e këtij vendi hedhin hipotezën se virusi mund ta ketë patur origjinën jashtë Kinës.
Një zëdhënës i Ministrisë së Jashtme kineze akuzoi sekretarin amerikan të Shtetit, Mike Pompeo, se i kishte sajuar provat e tij “duke krijuar një gënjeshtër për të mbuluar një gënjeshtër tjetër”.
