Kina ka hedhur poshtë një raport të inteligjencës perëndimore, që tregon se zyrtarët e saj i kërkuan Rusisë të priste derisa të përfundonin Lojërat Olimpike Dimërore të Pekinit përpara se të pushtonte Ukrainën.
Të enjten, Ministria e Jashtme e Kinës e quajti historinë “krejtësisht të rreme” dhe një përpjekje për të “tërhequr vëmendjen dhe fajin”.
CNN ka raportuar më herët se një burim i njohur me inteligjencën tha se zyrtarët amerikanë e shohin gjerësisht raportin si të besueshëm, por të dhënat e tij janë të hapura për interpretim.
Ekzistenca e raportit u publikua për herë të parë nga New York Times.
Të enjten, Ministria e Jashtme e Kinës iu përgjigj raportit të New York Times, duke e quajtur atë “krejt të rremë dhe të neveritshme, për të larguar vëmendjen dhe fajin”, duke përsëritur se shkaku i konfliktit aktual është zgjerimi drejt lindjes i NATO-s, i mbrojtur nga SHBA-ja.
“Ne shpresojmë që ata që janë përgjegjës për krizën, duhet të reflektojnë mbi rolin e tyre në krizën e Ukrainës. Të marrin përgjegjësitë e tyre të duhura dhe të ndërmarrin veprime konkrete për të lehtësuar situatën dhe për të zgjidhur çështjen, në vend që të fajësojnë të tjerët”, tha zëdhënësi i ministrisë, Wang Wenbin në një konferencë.
Burimi i lajmit: CNN. Përshtatur nga Tirana Today
