Në këto orë të vështira që po kalon Italia, është Kina që po i qëndron pranë duke asistuar me mjekët e tyre të specializuar. Një ekip prej pesë mjekësh kinezë me përvojë, janë nisur për në Itali bashkë me anëtarë të Kryqit të Kuq të Pekinit, dhe specialistë nga Qendra Kineze për Kontrollin dhe Parandalimin e Sëmundjeve.
Sipas CCTV, ata do të sjellin “aftësitë e tyre” dhe furnizime për të ndihmuar Italinë kundër epidemisë së koronavirusit. Në një telefonatë me kolegun italian, Ministrin e Jashtëm Luigi Di Maio, homologu kinez Wang Yi ka shprehur gatishmërinë për ta ndihmuar me personelin e specializuar mjekësor.
“Nëse pala italiane kërkon ta ndihmojmë me ekipe mjekësh specialist, Kina është e gatshme të dërgojë personel mjekësor për të ndihmuar Italinë”.
Kina raportoi sot edhe 22 vdekje të tjera, për një total prej 3158 nga mbi 4000 në të gjithë botën. Me vetëm 24 të infektuar në 24 orët e fundit, totali i të prekurve që nga fillimi i epidemisë është më shumë se 80 000 nga mbi 117 000 raste në të gjithë botën.
Bashkimi Europian ka planifikuar të çlirojë një fond prej 25 miliardë eurosh, për të mbështetur sistemin shëndetësor, tregun e punës dhe pjesët më të rrezikuara të ekonomisë së Unionit, i prekur nga epidemia e koronavirusit.
Dritë të gjelbër gjithashtu mori Italia, mbi fleksibilitetin buxhetor. Komisionerja për Konkurrencë, Margrete Vestager u shpreh e gatshme të punojë me qeverinë italiane për masa shtesë, për të korrigjuar problemet serioze të ekonomisë.
Koronavirusi po vazhdon të infektojë botën. Franca po përgatitet për emergjencën e koronavirusit.
