Presidenti kinez Xi Jinping ka biseduar në telefon me homologun e tij rus Vladimir Putin. Dy udhëheqësit thuhet se “kishin një shkëmbim të thelluar të pikëpamjeve, mbi situatën në Afganistan”.
Sipas mediave shtetërore, Xi “theksoi se Kina respekton” sovranitetin, pavarësinë dhe integritetin territorial të Afganistanit”, dhe tha se Kina “po ndjek një politikë të mos ndërhyrjes në punët e brendshme afgane”.
Megjithatë, ai vuri në dukje se “të dyja palët ranë dakord që situata aktuale ndërkombëtare dhe rajonale është komplekse dhe evoluon”, dhe shtoi se të dy vendet do të “mbajnë komunikimin”.
Gazeta ‘Global Times’, e mbështetur nga shteti, kishte treguar më herët se qëndrimi i Kinës ndaj talebanëve mund të ndryshojë, nëse ngjarjet në Afganistan kanë një “ndikim negativ në Xinjiang”, rajoni kinez që kufizohet me vendin.
Sot Ministria e Jashtme ka theksuar se “Kina mban komunikim të qetë me talebanët”.
Ajo që mungonte dukshëm nga mbulimi mediatik i bisedës midis zotit Xi dhe Putin ishte ndonjë përmendje e rolit të Perëndimit në Afganistan. Megjithatë, Xi theksoi rëndësinë e dialogut politik nga të gjitha palët.
Ditët e fundit, mediat në Kinë kanë theksuar se SHBA nuk mund të largohen thjesht nga Afganistani.
Mediat kanë theksuar komentet e fundit të personelit të Ministrisë së Jashtme, të cilët kanë kritikuar tërheqjen “e nxituar” të SHBA nga Afganistani, duke u shprehur se ata kanë thënë se kjo ka lënë “trazira dhe kaos”.
Burimi i lajmit: BBC. Përshtatur nga Tirana Today
