Një 40-vjeçar me emrin Danjel Bushi nga Durrësi, ka mbërritur në orët e para të mëngjesit i plagosur me armë zjarri në spitalin e Durrësit.
Ngjarja ka ndodhur në lagjen Nr. 17 Durrës. Nga veprimet e shpejta hetimore paraprake të kryera, ka rezultuar se Danjel Bushi është plagosur nga 28-vjeçari Gabriel Peqini.
40-vjeçari ka shkuar në spital për ndihmë mjekësore, nga ku më pas janë njoftuar blutë e Durrësit. Burimet bëjnë me dije se ai ndodhet në gjendje të rëndë shëndetësore. Po të njëjtat burime mësojnë se Danjel Bushi nuk rezulton një emër i panjohur për policinë, pasi në vitin 2016 është arrestuar për “armëmbajtje pa leje”.
Njoftimi nga policia
“Në orët e para të mëngjesit ka shkuar në spital për ndihmë mjekësore, i plagosur me armë zjarri në lagjen “Nr 17” Durrës, shtetasi D. B., 40 vjeç.
Pas njoftimit të marrë, shërbimet e Policisë kanë shkuar menjëherë në vendngjarje dhe nga veprimet e shpejta hetimore paraprake të kryera ka rezultuar se 40 vjeçari D.B, dyshohet se është plagosur nga shtetasi G.P., 28 vjeç.
Shërbimet e Policisë vijojnë kontrollin e zonës për kapjen e autorit.
Grupi hetimor nën drejtimin e Prokurorisë së Rrethit Gjyqësor Durrës ndodhet në vendngjarje, dhe po punon për sqarimin dhe zbardhjen e plotë të rrethanave të ngjarjes”, njofton policia.
