Një 41-vjeçar që ka shkelur urdhrin e mbrojtjes dhe ka kërcënuar me thikë bashkëshorten e tij, sot është vënë në pranga. Uniformat blu, sapo janë sinjalizuar për këtë rast, kanë shkuar në vendin e ngjarjes.
Falë ndërhyrjes së tyre, është bërë e mundur parandalimi i ngjarjes. Policia ka vënë në pranga shtetasin Ç. M., 41 vjeç, si dhe kanë sekuestruar në cilësinë e provës materiale mjetin prerës (thikë), me të cilën ky shtetas kërcënonte për të vrarë bashkëshorten e tij.
“Shërbimet e Komisariatit të Policisë Nr. 6, pas njoftimit të marrë se në Yrshek, në ambientet e banesës, shtetasi Ç. M. kishte shkelur urdhrin e mbrojtjes të vendosur nga Gjykata për bashkëshorten e tij dhe po ushtronte dhunë fizike dhe psikologjike ndaj saj, si dhe po e kërcënonte atë me thikë, menjëherë kanë shkuar në adresën e dhënë duke parandaluar përshkallëzimin e mëtejshëm të dhunës dhe ngjarjen e mundshme kriminale.
Shërbimet e Policisë kanë prangosur shtetasin Ç. M., 41 vjeç, si dhe kanë sekuestruar në cilësinë e provës materiale mjetin prerës (thikë), me të cilën ky shtetas e kërcënonte për ta vrarë bashkëshorten e tij”, thuhet në njoftimin e policisë. Materialet i kalojnë Prokurorisë pranë Gjykatës së Shkallës së Parë Tiranë, për veprime të mëtejshme.