Presidentja e Komisionit Evropian, Ursula Von der Leyen, premtoi se BE do të qëndrojë pranë vendit tonë. Në nisje të Konferencës së Donatorëve të mbajtur për Shqipërinë, për rindërtimin pas tërmetit, ajo u shpreh se tërmeti ishte një solidaritet mes shqiptarëve dhe evropianëve, dhe se Komisioni Europian angazhohet për të dhënë 100 milionë euro për rindërtimin e Shqipërisë.
“Shtetet anëtare kanë ndërmarrë një angazhim të madh. Komisioni Evropian vetëm, angazhon 100 mln euro për rindërtimin e Shqipërisë nga buxheti i BE-së. Kjo përtej 15 mln euro që unë deklarova në dhjetor, ku nuk përfshihen kontributet e shteteve anëtare. Ju ftoj që të gjithëve të kontribuoni dhe ta ndihmoni Shqipërinë që të ngrihet në këmbë shpejt”.
“Kjo është një histori humbje, por edhe një histori heronjsh, një solidaritet mes shqiptarëve dhe evropianëve. Brenda disa orësh, ekipet e shpëtimit mbërritën në Shqipëri.
Menjëherë aktivizuam mekanizmin e mbrojtjes civile evropiane. Ekspertët tanë mbërritën në Shqipëri, për të vlerësuar dëmtimet. I gjithë BE u mobilizua për një vend që është në zemër të BE, dhe që një ditë besoj se do jetë në BE. Solidariteti nuk ka ardhur vetëm nga BE. Sot me këtë pjesëmarrje ju tregoni reagimin e fortë të komunitetit ndërkombëtar.
E gjithë bota është mobilizuar. Ne kemi parë ekipe shpëtimi serbe dhe kosovare që kanë punuar. I gjithë Ballkani është bashkuar në solidaritet dhe solidariteti shpëton jetë. Mijëra shtëpi duhen rindërtuar, shkolla dhe spitale duhen restauruar, biznese janë shkatërruar. Kostoja është vlerësuar 1 mld euro. Shqipëria e vetme nuk mund ta përballojë këtë barë. Sot ne i premtojmë popullit shqiptar se jemi aty për një kohë të gjatë, solidariteti do të jetë po aq i fort sa ishte në orët e para pas tërmetit.
Askush nuk mund ta plotësojë boshllëkun e atyre që kanë humbur, por ne mund ta ndihmojmë Shqipërinë ta fillojë nga e para. Bashkë mund ta bëjmë vendin tuaj më të fortë sesa ishte më parë. Në muajt që do të vijnë do të punojmë së bashku, do të sigurojmë që angazhimet tona të plotësohen plotësisht në kohë dhe që investimet tona të kenë ndikim në terren, në transparencë të plotë dhe llogaridhënie”.
