Dhuna prej javësh nuk mungon në Kategorinë e Dytë. Këtë javë skena të shëmtuara janë regjistruar në sfidën mes Butrintit dhe Tepelenës e vlefshme për Grupin B. Shkak për këtë përplasje është bërë një dyluftim sportiv, teksa situata ka degjeneruar në përplasje fizike. U desh ndërhyrja e forcave të rendit që situata të qetësohej disi.
Pas disa minutash ndërprerje, loja rifilloi sërish, për tu zhvilluar edhe minutat e mbetura. Butrinti arriti të triumfonte në këtë përballje me rezultatin 2-1 falë golave të Dhramit dhe Llojaj. Për miqtë golin e shënoi Kalemi. Sarandjotët e mbyllën takimin me 10 lojtarë, pasi Mucaj u ndëshkua me karton të kuq, për goditje të kundërshtarit. Ky i fundit ishte dhe shkaktari i situatës të tensionuar që u krijua në fundin e ndeshjes.
Mësohet se ekipi i Tepelenë u largua nga Saranda nën shoqërimin e forcave të shumta të Policisë, për të shmangur ndonjë përplasje të dytë pas ndeshjes.
