Kandidati për Këshillin e Lartë të Prokurorisë, Kozma Jano ka qenë pjesë e Sigurimit të Shtetit, por për këtë në dokumentin e publikuar thuhet vetëm se: “Nga shqyrtimi i dosjes së kandidatit ka rezultuar se mungonte dëshmia e gjuhës së huaj dhe lista e notave e noterizuar”.
Edhe ky i fundit në një sqarim të shpërndarë për median ka thënë se nuk ka punuar asnjë ditë të vetme për sigurimin e shtetit.
“Nuk jam përfshirë në asnjë marrëdhënie me Sigurimin e Shtetit, por as si individ dhe as në ushtrimin e profesionit tim, nuk kam dëmtuar asnjë person, në asnjë lloj forme, si gjatë diktaturës ashtu edhe gjatë demokracisë”.
Dokumentin e nxjerrë nga PD, Jano e quan sajesë me qëllim baltosjen e emrit të tij. “Letra e bakallit me sfond të zi dhe “stilolaps blu” që u publikua sot, është një sajesë e shkruar me dorën e atyre që akuzuan, vetëm e vetëm me qëllimin e përballjes së emrit tim”, sqaron Jano i cili thekson se kandidimi i tij për anëtar të KLP-së vjen pas një karriere të gjatë si avokat dhe kryetar i Dhomës së Avokatisë në Lushnje që prej vitit 1994.
Ndërkohë Kandidati Altin Hazizaj, ka qenë i dënuar, dhe vendimin ndaj tij është dhënë vendimi nga Gjykata e Shkallës së Parë Tiranë që vulosi dënimin me gjobë ndaj tij.
Sonte në Ora Neës ai ka pranuar se ka qenë i shoqëruar në polici në periudhën kur ka punuar si gazetar po ka mohuar kategorikisht faktin se ka qenë i dënuar.
“Nuk kam qene ne ndjeni për dënimin. Kam qene ne komisariat dhe jam liruar me masë paraqitjeje“, deklaroi Hazizaj.
Reagimi i plotë i Kozma Jano
“Tërësisht i habitur nga akuzat në drejtim të emrit tim, të artikuluara sot nga forca politike më e madhe në opozitë, ndjej detyrimin e sqarimit të së vërtetës.
Si profesionist i sistemit të drejtësisë, në asnjë rast nuk do të doja të isha pjesë e debatit politik, apo më keq akoma të jem vetë protagonist i tyre.
Por, detyrimin për sqarim, ndjej t’ia drejtoj opinionit publik, në respekt të integritetit dhe devotshmërisë sime në profesion, duke shprehur vetëm keqardhje për inicimin e fushatës së përbaltjes pa asnjë fakt dhe provë ndaj meje.
Këto shpifje u artikuluan në momentin që shorti i nënkomisionit parlamentar për përzgjedhjen e kandidatëve për KLP përzgjodhi kandidatet që do ti propozoheshin parlamentit për aprovim.
Është në dorën e nënkomisionit si organ legjitim për të bërë përzgjedhjen. Sa i takon akuzave dhe shpifjeve, dua të sqaroj se vetëm nuk jam përfshirë në asnjë marrëdhënie me sigurimin e shtetit, por as si individ dhe as në ushtrim të profesionit tim, nuk kam dëmtuar asnjë person, në asnjë lloj forme, si gjatë diktaturës edhe gjatë demokracisë.
Unë kurrë nuk kam patur teserë të ndonjë partie, as në kohën e diktaturës dhe as sot. Sfidoj çdo kënd që ka artikuluar këto shpifje të ulëta, ti provojë ato.
Letra e bakallit me sfond te zi dhe “stilolaps blu’’ që u publikua sot, është një sajesë e shkruar me dorën e atyre që akuzuan, vetëm e vetëm me qëllimin e përbaltjes së emrit tim.
Kandidimi im për anëtar të Këshillit të Lartë të Prokurorisë vjen natyrshëm pas një karriere të gjatë profesionale si avokat, si dhe Kryetar i Dhomës së Avokatisë Lushnjë, që prej vitit 1994.
Në asnjë rast, si drejtues i Dhomës së Avokatisë Lushnjë për një periudhë afro 24 vjeçare, emri im nuk është përfolur për asnjë shmangie ndaj atij për të cilin punoj dhe besoj: ligjit dhe vetëm ligjit.
Karriera ime e gjatë si drejtues ka dëshmuar për aftësi shumë të mira komunikimi, pune në grup, dhe zgjidhjen me efiçence të problemeve, cilësi këto që do të manifestohen nga ana ime, edhe në Këshillin e Lartë të Prokurorisë.
Në çdo rast mbetem i hapur dhe në pritje, të çdo kujt që ka artikuluar akuzat në drejtim të emrit tim, të mi provojë ato. Në të kundërt, të ketë burrërinë politike të përgënjeshtrimit dhe faljes publike.
Deri sa ta gjejnë guximin e faljes, si profesionist në fushën e zbatimit të ligjit, kam vetëm një këshillë. JO gjithmonë mjeti, justifikon qëllimin. Kjo vlen edhe kur gjithçka bëhet për konsum politik”.
