Kryeministri Edi Rama në fjalën e tij të mbajtur në Kuvend, i ka kërkuar presidentit Meta që të reflektojë dhe të mos ndërmarrë asnjë veprim tjetër antikushtetues, ndërsa në rezolutë nuk figuronte shkarkimi i tij nga posti i Presidentit.
Kuvendi i Shqipërisë vlerësoi se vendimi i Presidentit për shfuqizimin e dekretit për caktimin e datës së zgjedhjeve për qeverisjen vendore, është një akt pavlefshëm, me pretendimin se është nxjerrë në kapërcim të kompetencave kushtetuese dhe ligjore të institucionit të Presidentit.
Po ashtu, Rama u shpreh se Meta nuk ka bërë vetëm të këqija, por ka dhënë dhe kontribut pozitiv në karrierën e tij politike.
“Ilir Meta e ka humbur të drejtën të qendrojë në zyrën e Presidentit me pëlqimin tonë. Një President tani, që argumenton një marrëzi antikushtetuese sikur sheh filxhan me data gjëmash dhe kur e pyesin përgjigjet: “Ma përsërisni se nuk dëgjoj mirë. Këto kohët e fundit kam qenë sëmurë” është një njeri për të ardhur keq, shpreh sinqerisht keqardhjen time për të, si njeri, si mik, si kundërshtar si aleat që s’ka bërë vetëm të këqija por ka dhënë edhe kontribut pozitiv në karrierën e tij politike. I uroj sot megjithë zemër ta lexojë me qetësi dhe kthjelltësi rezolutën e këtij Kuvendi, nëse ka probleme me dëgjimin dhe s’do i kuptojë qartë fjalët që po thuhen sot në adresë të tij”, deklaroi Rama.
